► Klik hier vir 2023 se Reünieblad

► Klik hier vir Oranje Reünie se Erekode

► Klik hier om by die “Ou Eende” Facebookblad aan te sluit

Oranje reünie maak jou deel van duisende vroue vanoor die wêreld wat in dieselfde klaskamers as jy gesit het, pampoenrokke gedra het en die bloureën van Elizabeth le Rouxhuis bewonder het.

Oranje-wees is nie iets wat iemand sal verstaan wat nooit ’n pampoenrok aangetrek het nie. Dit is nie iets wat jou aan die hart gryp as jy nog nooit opgekyk het na die naald van die Vrouemonument nie.

Iemand sal nie hiermee identifiseer wat nog nooit in die kring gestaan het met Vivala OMS in jou ore nie. Niemand sal dit begryp wat nog nooit Driewerf Gegroet uit volle bors gesing het nie.

Oranje Reünie maak jou deel van ’n ketting van vroue met kosbare herinneringe, wat hulle jaarliks by reünies opnuut verbly in lewenslange vriendskappe wat op Oranje gesmee is, wat steeds bewus is van die rykdom van Oranje se geskiedenis en tradisies.

Die meetsnoere val steeds ná 10, 35, 50 en selfs 70 jaar in lieflike plekke. Ons erfenis is vir ons mooi. (Psalm 16:6).

► Reünie naweek-program
Klasreünies van 5, 10, 15, 20, 25, 30, 35, 40, 45, 50, 55, 60, 65 en 70 jaar word jaarliks deur die koördinering van Oranje reünie tydens die die skool se verjaardagvieringe in April gehou. Dit is altyd die eerste Vrydag van die tweede kwartaal.
→ Vrydag
– Funksie by die Vrouemonument om 10:00. Verversings word na afloop van die funksie by die Monument bedien.
– Besigtigingstoer van die skool om 12:00. Oud-Oranjes kom voor die ML Spiessaal bymekaar.
– Aand: Onderskeie jaargroepe reël hulle eie funksies.
→ Saterdag
– Reünie-ontbyt om 09:30 by die skool.
– Spesifieke jaargroepe bespreek vir die ontbyt by hulle sameroeper.
– Alle ander oud-Oranjes bespreek by die voorsitter van Oranje reünie.
– Aand: Onderskeie jaargroepe reël hulle eie funksies.
→ Sondag
’n Spesiale dankdiens om 08:00 vir huidige en oud-Oranjes en hulle gesinne in die Klipkerk. Die kore van die hoër- en meisieskool tree op.

► Gauteng en Wes-Kaap reünies
Oud-Oranjes trek jaarliks in die eerste Saterdag van Augustus in Gauteng saam en in die laaste Saterdag van Augustus in die Wes-Kaap.

► Betrokkenheid deur die jaar
Oranje Reünie bied gedurende die jaar verskeie funksies by die skool aan:

→ Graad 8’s besoek Onze Rust
Oranje reünie neem jaarliks die graad 8’s as deel van die oriëntering na Onze Rust, die geskiedkundige woning van die skool se stigter, oudpres. MT Steyn. Hier leer hulle van Steyn se stigtersideaal, hulle besoek onder meer sy studeerkamer en slaapkamer, stap na die boom van sameswering en die blokhuis. Dit is tradisie, om soos van ouds, in die yskoue swembad te swem en waatlemoen te eet.

→ Matriektee
Met die jaarlikse matriektee word gr. 12’s verwelkom as amper oud-Oranjes. ’n Oud-Oranje spreker word genooi om die matrieks toe te spreek. Tydens die geleentheid ontvang elke matriek ’n Oranje reünie-balkie as geskenk.

→ Graad 7-funksie
Die leerlingraad van die hoërskool word genooi om die graad 7’s in te lig oor die verskillende aktiwiteite van die hoërskool. Sportliedjies word gesing en die kreet word geskree. Tydens hierdie geleentheid ontvang elke gr. 7 dogter ’n boekmerk met ’n skoolfoto van haarself as aandenking.

→ Graad R-funksie
Groot opgewondenheid heers jaarliks onder die kleuters met die graad R-funksie. Die drie eende van Oranje se skoolwapen kom kuier om hulle te vertel van die “groot skool”. Dit word gedoen in die vorm van ’n poppekas.

► Kontakbesonderhede
Vir navrae kontak Sarette Botha (voorsitter van Oranje Reünie) by 079-870-0495 of sarette1972@gmail.com.